വിഷുവം പ്രതിഭാസത്തിന്റെ ഭാഗമായി തിരുവനന്തപുരം ശ്രീപദ്മനാഭസ്വാമി ക്ഷേത്രത്തിൽ ബുധനാഴ്ച അപൂർവ സൂര്യദർശനം നടക്കും. വർഷത്തിൽ രണ്ടുതവണ മാത്രം അനുഭവപ്പെടുന്ന ഈ ആകാശക്കാഴ്ച കാണാൻ ഭക്തരും സന്ദർശകരും ക്ഷേത്രത്തിലെത്തും. വൈകിട്ട് അഞ്ചുമുതൽ കിഴക്കേനടയിൽ നിന്ന് ഗോപുരവാതിലുകളിലൂടെ സൂര്യകിരണങ്ങൾ ദൃശ്യമാകുന്ന അപൂർവ നിമിഷങ്ങൾ കാണാം
തിരുവനന്തപുരം ശ്രീപദ്മനാഭസ്വാമി ക്ഷേത്രത്തിന്റെ ഗോപുരവാതിലുകളിലൂടെ സൂര്യൻ ദൃശ്യമാകുന്ന അപൂർവ പ്രതിഭാസമാണ് ബുധനാഴ്ച അരങ്ങേറുക. വിഷുവം എന്നറിയപ്പെടുന്ന ഈ ജ്യോതിശാസ്ത്ര പ്രതിഭാസം വർഷത്തിൽ രണ്ടുതവണ മാത്രമാണ് സംഭവിക്കുന്നത്.
വൈകിട്ട് അഞ്ചുമുതൽ ക്ഷേത്രത്തിന്റെ കിഴക്കേനടയിൽ നിന്ന് ഭക്തർക്ക് ഈ അപൂർവ ദൃശ്യം കാണാനാകും. അതേസമയം, കാലാവസ്ഥ അനുകൂലമല്ലെങ്കിൽ കാഴ്ച നേരിട്ട് അനുഭവിക്കാൻ കഴിയാതെ വന്നേക്കാം.
രാവിലെ കിഴക്കേ പ്രവേശന കവാടത്തിലൂടെ എത്തുന്ന സൂര്യകിരണങ്ങൾ ആദ്യം സ്വർണധ്വജത്തെ പ്രകാശിപ്പിക്കും. തുടർന്ന് കിരണങ്ങൾ ശ്രീകോവിലിന്റെ മധ്യവാതിലിലേക്ക് എത്തുന്ന തരത്തിലാണ് ക്ഷേത്രത്തിന്റെ വാസ്തുവിന്യാസം.
വൈകിട്ട് സൂര്യൻ ഗോപുരത്തിന് പിന്നിൽ അസ്തമിക്കുമ്പോൾ ഓരോ നിലയിലുമുള്ള വാതിലുകളിലൂടെ സൂര്യകിരണങ്ങൾ പുറത്തേക്ക് തെളിഞ്ഞുവരും. ഇതോടെ ഗോപുരവാതിലുകളിലൂടെ സൂര്യപ്രകാശം കടന്നുപോകുന്ന അപൂർവ കാഴ്ച ദൃശ്യമാകും.
സൂര്യൻ ഭൂമധ്യരേഖയ്ക്ക് നേരെ എത്തുന്ന ജ്യോതിശാസ്ത്ര പ്രതിഭാസത്തെയാണ് വിഷുവം, അഥവാ ഇക്വിനോക്സ് എന്ന് പറയുന്നത്. ഈ സമയത്ത് പകലിന്റെയും രാത്രിയുടെയും ദൈർഘ്യം ഏകദേശം തുല്യമായിരിക്കും.
സാധാരണയായി വർഷത്തിൽ മാർച്ച് 20നും സെപ്റ്റംബർ 22/23നുമാണ് വിഷുവം സംഭവിക്കുന്നത്. ഭൂമിയുടെ അച്ചുതണ്ടിന്റെ ചരിവും സൂര്യനെ ചുറ്റിയുള്ള ഭൂമിയുടെ സഞ്ചാരവുമാണ് ഈ പ്രതിഭാസത്തിന് പിന്നിൽ.
വിഷുവം സംഭവിക്കുന്ന സമയത്തെ സൂര്യന്റെ സ്ഥാനം കൃത്യമായി കണക്കിലെടുത്താണ് ശ്രീപദ്മനാഭസ്വാമി ക്ഷേത്രത്തിന്റെ ഗോപുരവാതിലുകളുടെ നിർമാണം പൂർത്തിയാക്കിയതെന്നാണ് പറയപ്പെടുന്നത്.
News Desk
സൈബര് നിയമ പ്രകാരം അശ്ലീലവും നിയമ വിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കേണ്ടതാണ്. വായനക്കാരുടെ അഭിപ്രായങ്ങള് വായനക്കാരുടെത് മാത്രമാണ്.
Loading...please wait
